كلمات اوبريت سيرة ال سعود، في الآواني الأخيرة تم تقديم اوبريت سيرة ال سعود من قِبَل المستشار في الديوان الملكي السيد سعود القحطاني، حيث قام بنشر مقطع فيديو عبر حسابه الرسمي تويتر يحتوي على كلمة الأوبريت.
كلمات اوبريت سيرة ال سعود
الأرض هذي أرض دين وحضاره
من يوم كانت جاهليّه وجِهّال
وأرض النبي وأصحابه واهل داره
صلى محمد فوقها واذّنْ بلال
يزيد حاضرها المشرّف نضاره
عريق ماضيها الذي فيه تختال
وفي سيرة آل سعود مجد وإثاره
صارت على مرّ الزمن مضرب أمثال
الجد مانع فيه طيب وضفاره
من قلبه الدرعية سهال ورمال
إليا علوا ليل تغشى نهاره
تموج الأرض وكنّها فوق زلزال
وإليا رضوا سيلٍ يسوق البشاره
صدورهم وكفوفهم سمحة قْبال
الحرب لاجل الملك خاضوا غماره
لين استقام الميسم وشرها زال
ردّوا على الوادي الحنيفي ازدهاره
في ليلةٍ حلوة نِبا طيّبةَ فال
واختاروا التوحيد رغم المكاره
واضفى عليهم هيبه وعِزّ واجلال
وطن علم توحيد ربه شعاره
ما ينهزم لا والذي بالسما عال
لهم من الخاطر سلام بحراره
بيض النوايا ترجموها بالأعمال
محمد بن سعود كان اختياره
جمع العرب عقب التفرق والإهمال
يبي يلم الشمل عقب اندثاره
يبني لهم دوله وحال الذي حال
هذي حياته لين حان احتضاره
لولاه كان ايامهم سود وهزال
وعبدالعزيز اغتيل غدر وحقاره
في مسجده مثل عمر يوم يغتال
دسّ المجوسي خنجره في وزاره
واغتال رَجّالٍ عن الفين رجّال
وسعود دوّى بالحجاز انتصاره
رد الحسا بالسيف ما هو بالاموال
الراي رايه والحدب مستشاره
بين الحجاز ونجد بالسيف يجتال
وانشد عن الوالي وكيف انكساره
منصوب الاتراك الذي شاف الاهوال
تصدّوا لوالي العراق بجساره
بالمعركة وقفاتهم وقفة جبال
والشام واليها رجع وهو كاره
هو عارف بن سعود يفعل ليا قال
قِدْ ذاقوا الاتراك منا الخساره
في وادي الصفرا دما جيشهم سال
عبدالله بن سعود قاد بجداره
المعركه حتى وطا راس من عال
ويوم العدوّ حاضر وطوّل حصاره
صار العهد بس غدروا فيه الانذال
تعاونوا والغرب خلف الستاره
من كم سنة ما هو من أيام وليال
أقولها صدق بصريح العباره
لولا الغدر ما كان للترك مدخال
وتركي ولد عبدالله اللي بغاره
سبع سنين وهو مع الترك بقتال
الصبح غاره وآخر الليل غاره
بالسيف الاجرب رجلي ونوب خيال
لين انتصر عليهم ورد ثاره
تاريخ والتاريخ يكتب وينقال
عقبه رجع بمشاري وفك أساره
من حبس حمران العتاري والأغلال
ومن بعد ما جابه وأطلق هجاره
غدر به مشاري عقب ذيك الأفضال
وأخذ قضاه اللي براسه نعاره
فيصل وخلَّا جثته لأشهب اللال
وفيصل مثل تركي مسارِه مساره
أجيال تعطي راية الحكم لاجيال
زاد الحكم قوّه وزاد انتشاره
وهذي نتيجة همة وعزم الابطال
وعبدالله الفيصل ورغم المراره
وفاة أبوه وحكم همومه ثقال
ساس الامور بحكمته واقتداره
على خطى فيصل ودربه ولو طال
واليوم وحَّدْها الذي شب ناره
من مشعل الشرع وعن الشرع ما مال
عبدالعزيز وهذي أعظم ثماره
أمن وأمان بكل حلٍّ وترحال
في قوة الفاروق عدل وسطاره
قوة على الحق وعلى كل عيَّال
الحكم بالدرعية أحيا آثاره
بانت معالمها عقب ماهي أطلال
حقق لجده حلم طال انتظاره
أسس لهم دولة من الجال للجال
وجاء للعرب دولة بعزم وشطاره
من عقب ما بدر العرب عوّد هلال
يا لله عسى في جنة الله قراره
رد الحجاز وخلّف أمجاد ورجال
سعود ابو خيرين عمّر دياره
بين الدول خلى لها سعود منزال
بعده حَكَم فيصل وفيصل قراره
بالنفط خلّى الغرب يشعر بالاذلال
وخالد لكل الشعب ليَّن جواره
قلبه لشعب المملكه صار مدهال
غيثٍ همى في كل ديره وحاره
من وين ما وجّه على وادي سال
وفهد للامّه كان رمز ومناره
خيره على بلدان الإسلام همّال
يوم الغزو وقّف على شان جاره
ارخص لاجل جيرانه الروح والمال
ويوم المنامه شب فيها شراره
عبدالله انهت وقفته كل الاشكال
خدم حرم ربي وزاده عماره
عادل لو عقاله على الراس ميّال
وسلمان جرّ فيه لين ونزاره
يخاف منه المجرم ويا من الذال
هو نور نجد اللي ما يخفر ذماره
جاها وهي جت له على كل منوال
اسمه تفاصيل الفخر واختصاره
جميل فعله سيدي صعب ينطال
يوم اليمن شاف الجميع انهياره
تصدّر المشهد فِعِل ماهي اقوال
رد اليمن لاهله ورد اعتباره
لولا وقوفه كان حال اليمن حال
واليوم ابن سلمان يعلن خَياره
العدل ثم العدل في كل الأحوال
محمد محمد قرار وإداره
تعقد على محمد وشرواه الامال
حِرٍّ شهر وارض العروبه مداره
ودّه يظلّلها عن الشمس بظلال
سليل ملك ونسل شيخه واماره
عَرَّب الجدين والعم والخال
ملامح مْعَزِّي دهاه ووقاره
السيره السيره والافعال الأفعال
كنّه نفض عن قبر جده غباره
ولا هي غريبه تشبه الليث الاشبال
مهندس التغيير فكر ومهاره
عسى سموّه من بعيدين الآجال
صلى قبل حربه صلاة استخاره
على الفساد وشن حربه ولا زال
حنا على الطاعة ورهن الاشاره
نموت ما نطري الخيانه على البال
وانتم لهذا الدين صدر وصداره
واجيال تعطي راية الحق لاجيال
تحميل أوبريت سيرة آل سعود mp3
لتحميل أوبريت سيرة آل سعود mp3 انقر هنا.